متحدہ عرب امارات کے قریب ٹینکر پر حملہ، عملہ محفوظ

دبئی، متحدہ عرب امارات کے قریب خلیجی سمندری حدود میں ایک ٹینکر کو نامعلوم پروجیکٹائلز سے نشانہ بنایا گیا ہے، جس کی تصدیق برطانوی میری ٹائم ایجنسی برطانیہ میری ٹائم ٹریڈ آپریشنز (یو کے ایم ٹی او) نے کی ہے۔ واقعے میں خوش قسمتی سے جہاز کا عملہ محفوظ رہا اور کسی جانی نقصان کی اطلاع نہیں ملی۔

یو کے ایم ٹی او کے مطابق یہ واقعہ فجیرہ کے شمال میں تقریباً 78 ناٹیکل میل کے فاصلے پر پیش آیا۔ ایجنسی نے کہا ہے کہ واقعے کی تحقیقات جاری ہیں اور خطے میں بحری جہازوں کو انتہائی احتیاط کے ساتھ سفر کرنے کی ہدایت دی گئی ہے۔

یہ واقعہ ایسے وقت میں پیش آیا ہے جب خلیج کے خطے میں سمندری سکیورٹی کی صورتحال پہلے ہی کشیدہ ہے۔ امریکا اور ایران کے درمیان جاری کشیدگی کے باعث بحری راستوں پر خطرات میں اضافہ ہوا ہے، جبکہ آبنائے ہرمز میں تجارتی سرگرمیاں متاثر ہو رہی ہیں۔

مردان میں کم عمر لڑکی کو سوارہ رسم سے بچا لیا گیا، جرگہ کے 11 افراد گرفتار

امریکی صدر ڈونلڈ ٹرمپ نے اعلان کیا ہے کہ امریکا پیر سے آبنائے ہرمز سے گزرنے والے تجارتی بحری جہازوں کو حفاظتی اسکواڈ کے ذریعے لے جائے گا۔ امریکی حکام کے مطابق اس آپریشن میں گائیڈڈ میزائل ڈسٹرائرز، 100 سے زائد طیارے، ڈرونز اور تقریباً 15 ہزار فوجی اہلکار شامل ہوں گے۔

بحری ماہرین کے مطابق خلیج میں پہلے ہی 900 سے زائد تجارتی جہاز موجود ہیں، جبکہ تنازع سے قبل یہ تعداد 1100 سے زیادہ تھی۔ صورتحال کے باعث عالمی توانائی کی ترسیل اور تیل کی سپلائی چین پر دباؤ بڑھنے کا خدشہ ظاہر کیا جا رہا ہے۔

حکام نے کہا ہے کہ سمندری راستوں کی حفاظت کے لیے بین الاقوامی سطح پر کوششیں جاری ہیں، تاہم خطے میں کشیدگی کم نہ ہوئی تو مزید واقعات کا خطرہ برقرار رہ سکتا ہے۔